Xitay türmisidiki uyghur paaliyetchi höseyin jélilning mektubi élan qilindi
Muxbirimiz ömer qanat xewiri

2008-05-22

Source: RFA news in Uyghur

Kanada puqrasi, uyghur paaliyetchi höseyin jélil bezi bölümliri, peyshenbe küni kanadaning dangliq géziti hésablanghan glob énd mél gézitide neshr qilinghan xétide türmidiki ehwali heqqide bir qeder toluq melumat bergen hemde erkinlikke chiqish toghrisidiki ümidwarliqining künsiri aziyiwatqanliqini ipadiligen.

Hüseyin jélil 2008‏ - Yili 3‏ - Ayning 10‏ - Küni yazghan, üch sehipilik xétining béshida, köp dert elemge qoyghanliqi üchün, anisidin kechürüm sorap mundaq dégen: “essalamu eleykum qedirlik, köyümchan, méhriban, söyümlük ana qandaq ehwalliri? men silini köp yighilitip qoydum. Mining derdimni köp tartip ketle. Méni kechürüp, mendin razi bolup her zaman dua qilishlirini soraymen. Méning silerni bek körgüm keldi. Köp séghindim. Mumkin bolsa kiragha pul tapalisanglar, anam bilen ikki oghlumni ekilip men bilen körüshtürüp ketsenglar bolatti.

Xétide qirindashliridin anisini, téximu köp asrishini sorighan höseyin jélil, ” shunga anam özini asrap, yighlimay, manga dua qilishini soraymen. Xoda anamgha köp ejir ‏ - Sawap bersun, balilirimni chong qilip asrap qatargha qatti. Buni héch qayturalmaymen. Xoda mukapatini bersun. Méning yolumni méngip ürümchige köp qétim kélip qiynaldi. Bu qétim bir kelse, bir körüshüwalsam bek yaxshi bolatti, köp séghindim ” deydu.

Bundin burun ikki qétim xet yazghanliqini lékin, xétige jawab alalmighanliqini eskertken hüseyin jélilning xétidin uning türme sirtida élip bériliwatqan paaliyetlerdin pütünley xewersiz ikenliki otturigha chiqmaqta. Höseyin jélil xétining bu bölümide anisidin, ayali kamilening ehwalini sorap mundaq deydu: ” kamile bilen alaqiliship turuwatamsiler? néme deydu? imkan bolsa, méning yolumni méngip qoysa yaxshi bolatti. Men héch nersini bilelmidim. Héch nersidin xewirim yoq. Shunga bezide ayalim kamileni esleymen. Bérer yaxshi künler bolarmu? menmu hayatliqqa érishelermenmu? dep ghem endishe qilip künlerni ötküzimen. Mende néme chare?”

“Kamile eger mumkin bolsa, béyjingdiki kanada elchixanisi bilen alaqe qilip körse. Elchixanidin birer kishi bolsimu kélip men bilen körüshüp ketse bolatti. Lékin hazirghiche, héch kishi kélip mining bilen körüshmidi. Bunimu chüshenmidim. Emma men elchixanidin birer kishining kélip men bilen körüshüp kétishini ümid qilimen. Néme dégen bilen men shu kanadaning puqrasi. Shunga birersi kélip méni yoqlap, körüshüp kétishi yaxshi idi.”

Höseyin jélil türmidin yazghan bu xétini, qérindash we uruq - Tughqanlirigha qayta ‏ - Qayta salam yollash bilen axirlashturghan.